راجع نطروني
Lebjournal.com
By AlainSafa
ضباب ضباب ضباب
تطلعت برا الدني كلها ضباب
أنا ساكن بشمال أوروبا بعيد عن الوطن والأحباب
حبيت أتمشى لوحدي
تركت البيت وسكرت الباب
صارلي ٢٤ سني مرتاح وهني
بالمال صرت أكتر من غني
معارفي كتار متلايين الدني
وصلت لمرحلي قلت لحالي شو بعد بدك من هالدني ؟
أنا وماشي سمعت صوت بعيد ناداني
عم يحكي بلغة قلبي و عم يغني قرادي
دمعو عيوني وحسيت أني رحت عابلادي
قلي الصوت أنا ملاك جاي خصوصي كرمالك
ما بدي منك شي ،بس بدي منك تجي معي مشوار كرمالك
قلي غمض عيونك واشلح عنك وأترك تيابك هون
شلحت عني وصرت بزلط ربي، وما عاد عندي شي مخبى تا خبي
تركت كل شي وحسيت انو هلق جيت عالكون
أخذني الملاك عا تلة جبل عالي
حسيت بالدفا وقلي خي دخيل الله لحالي
قلي ما تفتح عيونك بعد … بدي منك تشم ريحة الورد
بعمري ما تنفست بهالقوة … شميت وصرت أرض رويايي الناشفة أروي
شميت ريحة بلادي …رجعت الضحكة لتمي ولقلبي السعادة
قلي الملاك هلق صار فيك تفتح عيونك وتتأمل
صار فيك تشوف وادي قنوبين وبشري وتشوف وين كان جبران يتأمل
سبحانك يا ربي صرخت من كل قلبي وصرت بشجر اللوز والتفاح اتغزل
ومن كتر الفرح نزلو دموعي نهر و صار يسقي الشجر العطشان و المشتاق لدموعي
قلي يا الآن ايمتى رح ترجع وتزين ربوعك وربوعي ؟
قلي يا الآن الغربي بتضل فجعاني وما بتشبع لا من دموعك ولا من دموعي
شوف وتطلع وقلي بربك قول … وين في أجمل من بلادك وين ؟
شوف الشوف والجبل
شوف الحب والغزل
شوف زحلة والعسل
بنات زحلة قلبك بيعشق وبستحلي
شوف كسروان ولحفد وحراجل وجونيه
شوف وين القمر كل ليلة بيتغزل بعيوني
قلي الملاك
شوف أرض الجنوب !
الأرض أرض الشهامة يلي مزروعة بالدم والقلوب
شوف الكروم والكرم عالدروب
شوف الشمال
شوف ما أحلى اهلو كيف الضيف بيستقبلو
شوف شو حلوي نومة العرزال
شوف الحلوي يلي ما بتروح أبداً عن البال
ليلة وحدة بحضنها بتسوى أجيال وأجيال
وبتستاهل تسافر كرمالها ألوف الأميال
شوف يا الآن شوف بيروت
بتتذكر شارع الحمرا وراس بيروت ؟
بتتذكر شارع بلس والاشرفية ؟
بتذكر شو عملت تا تشوفها للصبية؟
بتتذكر يا الآن بتتذكر !
أيام كنت بعدك زغير وكنت بالليل أنت واصحابك تروح تسهر ؟
وينك بعيد عن بلدك وين ؟
العمر عم يمرق وعم يشح النظر بالعينين
الدني رح تعيشها مرة ومرتين
بس متل بلادك ما في لو صار بدل الكون كونين
أنا بعرف أنك حابب ترجع شي يوم
أنا بعرف انو حلمك ترجع تقعد عالبلكون وتشوف البحر كل يوم الصبح
وانت قريب من حلمك
أنت هلق بالواقع
أنت عايش
ما تنطر كتير تا يصير كل يلي حابب انو يصير
مش كل يوم بينسم الهوا ..أيام بتجي أعاصير
مش كل يوم فيك تشوف الشمس وتدفى ..أيام بتعتم الدني بطقة الضهر وبيصير زمهرير
هلق إذا حابب ترجع عالضباب
وترجع تعد الايام تا ترجع تشوف الأصحاب
وترجع كل يوم تحلم تشرب قهوة
رح وصيك وصية
ما تنسى أنك من هون…. وهون خلقت وهون ريحة الورد بتفتح بواب قلبك و سماك
دخيلكن يا اصحابي إذا أنا نسيت تبقو تذكروني
وإذا متت قبل ما أرجع وحقق حلمي انتو بأحلامكن رجعوني
وخذو كل الشعر يلي كتبتو وزرعوه تحت زيتوني
ومن زيتها تبقو تمسحو جبين الحلوين وتقولولون يضلو يحبوني
بس ما تخافو يا اصحابي ما رح موت قبل ما انتو تذوقو بردقان من الليموني
الليموني يلي زرعتها بقلب حلوي ارضها خصبي وغصب عن دين الغربي رح اقطف الليموني
raw3aaaaaaaaaaaaaaaaa chou hal kalimet raw3a ya amar?????
kalam ktir 7elo, nshala bterja3 3a beldak w berja3 ana kamen, bakaytni ya zalami.