خيالي وأنا … لاول مرة
Lebjournal.com
By Alain Safa
أول مرة …كل شي بيبلش بأول مرة
أول إحساس وأول شعور
أول مرة منحس بالسعادة وأول مرة منبكي والدني فينا بتدور
أول مرة البنت بتصير أم وبتحمل طفلها متل شي عصفور
أول مرة منحب ومننحب ومنعرف إنو في شي اسمو عشق وزهور
مرة وحدة …هي مرة ..أوقات بتكون حلوة وأوقات بتكون مرة
مرة وحدة مننصدم وبيتغير لون الكون
مرة وحدة منخلق ومنعرف إنو كل شي بهالدني موءقت والعمر لحظة بتمر بسرعة من هون
مرة وحدة منحب بعدما نتعلم شو هوي الحب
مرة وحدة منموت مش تنين ،بس إذا ما عرفنا نعيش رح نموت كل يوم أكتر من مرتين
مرة وحدة منوقف عا مفرق الطريق وبيتلاقو عيوننا مدري كيف ووين
هيدي المرة الوحيدة هي القصة الفريدة
هي اللحظة والجائزة الكبيري
هي الكواكب بس يتلاقو كل شي عشر آلاف سنة تا يخلقو كواكب جديدي
هيدي هي المرة يلي شفتك فيها عا مفرق بالسما كنا سوى عم نفتش عا حلم تا ننظموا بقصيدي
تلاقو حروفك مع حروفي وسيوفك سنوا سيوفي
سيف وترس وخيول ورقص وعشق ولمس ، وجمل تحاكي جمل ونلعب لعبي مكشوفي
وقبل ما كنت فرجيكي عا شي كنتي بعيون قلبك وروحك تشوفي
مرة وحدة بس مش أكتر وبلش الحلم يكبر ويكبر
مرة وحدة ولو صار الوقت مأخر ..
مرة وحدة وسعت طرقات زغيري وصارت اوتوسترادات عم نتسابق فيها نحنا والعمر تا نشوف من بيوصل عالحلم ابكر
أول مرة بحكي بصوت عالي مع خيالي …بقلو حكي وبغمرو وبرقص معو وببكي عا كتفو وبشكرو على لطفو
أول مرة بحس بطعمة السكر … سكر مش حلو ..سكر منو الخمر بيسكر ..سكر بيفتح بواب ما بتتسكر
أول مرة عسل النحل طعمتو بتتغير …طعمة شفافك قالت للعسل صار الوقت تا تفل وتترك محلك لحدا غيرك يذوب قلوب مشتاقة تذوق طعمة السكر
أول مرة بعد هالعمر الطويل بتقصر المسافة وبتصير خيال لاحقني وين ما رحت وكيف ما جيت …خيال حقيقي مش مستحيل
يلي بيفتكر إنو العمر ناطرو تا يحقق أحلامو .بعدو ما عرف شو يعني مرة وحدة
يلي بيفتكر إنو المال هوي الخلاص بيكون بعدو طفل زغير ناسي إنو حليب الأم بيخلص بعد تلات سنين وهوي بعدو عم يرضع حليب بيحرق خالصة مدتو و طعمتو بنزين
أول مرة شفت ضو شعشعت منو الشمس ، وحسيت قيمة الدفا بحضنك واللمس ، وشفت كيف أحاسيسي واحد ورا واحد طلعو من الحبس
سمعت زغاريد وخرطشة بواريد وهيصة وغناني ورقص وشفت ناس منن ناس راحو تحت الدعس
هودي هني الناس يلي نسيو يعيشو حياتن ونسيو انن هون مبارح واليوم وبالامس
هودي هني يلي ما بيعرفو أول مرة … لانن بس عرفو أول مرة كانوا رايحين تحت الدعس
والناس الباقين يلي عم يزغردو ويهيصو ويعشقو ويرقصو وكل يوم بحياتن صاير عرس
هودي هني أنا وانتي يا خيالي وتوأم روحي انتي يا رسمالي
أول مرة بكتب عن خيالي بس مش آخر مرة لانك انتي عايشي معي
ولاول مرة بقلك … طالما الشمس شارقة والقمر واقف قبالي ، ما رح فيكي تفلي لوحدك لانك انتي خيالي
خيالي وأنا … لاول مرة
Discussion Area - Leave a Comment