أربع بنات زغار عم يحلمو يصيرو كبار
Lebjournal.com
By AlainSafa
أربع بنات زغار عم يحلمو يصيرو كبار
لينا ونور وماريا و ريتا ، أربع بنات وأربع حكايات
لبسو فساتينهن الحلوين وتجمعو و قعدو بمرجوحة
لينا لبست فستان الأحمر وعا راسها حطت برنيطة العسكر
ونور لبست فستانها الأخضر وصارت تتغنج وتتغندر
وماريا لبست فستانها الزهر وبلشت تحلم برفيق العمر
وريتا هالبنت يلي عم تخبر خبار كلماتها صغيري وعقلاتها كبار
لبست فستان أبيض ونقي متل قلبها النقي
بلشت ريتا تخبر عن الأيام وعن المستقبل وعن الصبيان
إنو كيف العصافير بيهاجرو لبلاد بعيدي وبيرجعو بيوم من الأيام
وهيك كمان هني الصبيان حتى لو صارو كبار بيضلو بعقلاتهن ولاد زغار
كانت عم تقلن كيف كانت تحلم هي وبعدها ببطن أمها قبل خمس سنين
قال كانت تحلم تلعب مع الملايكي وتقطف ورود وتزين السما بتشرين
وكيف كانت تحلم بصبي يحبها لانها حلوي وذكية وبتعرف حالها هي مين
قالتلهن قولكن رح يصير الحلم حقيقه تخمين أو انو لازم كون أنا متل ما أنا ريتا يلي بتعرف حالها هي مين ؟
ولينا يلي متل ألاميرة بكل شي
فكرت بيلي قالتو ريتا وقالت نحنا بنات ، والشباب بلا البنات ما بيسوو شي
أنا ما بدي كون بنت تحت أمر الصبي ،أنا أميرة بدي كون مغنجي ومدللي
بدي يكون عندي رفيق وحبيب وصديق وما يكون سميك وكسلان وحكوجي
بدي ياه يحب الرقص ويكون متلي نص اخوت ونص عبقري
بدي ياه يكون شاعر و مزين ومصمم فساتين وبيحل أكبر مشكلي
ونور يلي من نورها بتضوي الدني
قالت أنا بدي شب يكون حلو وغني
ما بدي امو وما بدي بيو وما ستو ولا جدو و لا عيلتو بتهمني
بدي ياه يكون طويل بتوصل ايدو لراس الميدني
وبدي ياه يعرف يغني عتابا وميجنا ويا هويدلك ويا هويدلي
قولكن بيصير متل ما بدي وبيصير حبيبي إلي ؟
وماريا يلي متوجة ملكة و بتلدغ بالثاء ، تطلعت بالبنات وقالت بكل هدوء
يا بنات يلي عم تكبرو كل يوم الدني حلوي وما بدها هالقد عجلة ،بدها هدوء
بكرة بث نكبر ونثير ثبايا ويثيرو الشباب يلحقونا
وبث نفوت عالمدرثة ونثير شاطرين ومن ثفوفنا يرقونا
وبث يثير معنى مثاري ونثتري ثيارات ونثفت وما يقدرو يلحقونا
ثاعثها رح تثوفو إنو الحياة حلوي حتى لو الثباب ما تجوزونا .
و ضلت القصة تكبر والمرجوحة تتمرجح والبنات كبرو وصارو صبايا
وصار يلي قالت عنو ريتا ،الشباب متل العصافير بيروحو وبيجو عالمواسم
وصارت ريتا سيدة نفسها كاتبة ناجحة وشاطرة وأخت الرجال
و لينا حبها شب نص اخوت نص عبقري شايفها ومش مصدق انها حبيبتو
كل يوم يرقصو والجيران يحرقصو وصوت الستيريو ما يخففو
و نور تلقطت بهونيك شب فرفور من بيت الغندور
قد ما بيحبها بيضل يحور ويدور
نسي امو ونسي بيو ونسي كل شي اسمو عيلة الغندور
وماريا الملكة يلي متوجة من هي وزغيري وبتلدغ بالثاء
ثار عندها ثيارة ثبور كتير مهضومي
وثار معها مثاري كتير وتجوزت شب حلو اثمو الأمير الثغير
وهيك صارت الدني ليل وخلصت العصرونية
والامهات ندهو للبنات يلا يا ولاد تا نروح عالبيت قبل ما يجي بيكن بيكون جوعان خطيي
Discussion Area - Leave a Comment