Posted on August 28th, 2009 by Alain Safa
Lebjournal.com
ألان صفا
كم في طفل زغير بمجتمع بيتألف معظمه من الشباب متل المجتمع اللبناني ؟
وقت قول طفل زغير بعني الطفل الرضيع لعمر ال ١٢ سنه لانه بعمر ال ١٣ بتبدأ فترة المراهقه .
كم في طفل عم يشوف أمه وبيو كل يوم فرحانين وبالن فاضي وما عندن هموم ؟
كم في طفل عم يسمع بيو عم يغازل امو ويدلعها كل يوم قبل ما يروح عالشغل؟
وكم في طفل عم يشوف المحبه الحقيقيه بين الناس بهالايام؟
كلنا كنا أطفال ونحنا جيل الحرب يلي تحملنا المصايب ويلي بعدنا مرعوبين لانه ذات الناس يلي رعبونا بعدن متسربلين بذات التياب
كلنا وقت يلي كنا زغار كنا نحلم نوعى شي نهار ويبطلو اهلنا يسمعو أخبار ويقرو الجرايد ويخبرو مين مات ومين نخطف ومين قنصو القناص .
حلم رعب وعيت منو وما بدي ولادي يحلمو ذات الحلم
من تلاتين سنه لهلق بعدها القصه هي ذاتها
مات جيل
وتهجر جيل
وتشرشح جيل
ونعطب جيل
وبعدو جيل العاطلين كامش البلد بمفكة الطائفيه والجهل والعناد الأرعن
انو يا لبنانيي مفكرين ما حدا رح يقرا تاريخ لبنان الحديث بعدما يصير يلي بدو يصير ؟
انو يا لبنانيي مفكرين انو العالم برات لبنان عم يمجدوا فيكن ؟
انو انتو مفتكرين ولادكن يلي إذا الله رضي عليهن وتركو لبنان وصار عندن جنسيه تانيه مش من العالم التالت رح يقولولكن برافو ؟
ولك التاريخ رح يلعن والتاريخ سيخ
بعد كل هالمصايب يلي صارت مين عم يسأل الأطفال رأيهم بالموضوع
الموضوع انو اللبناني تعود يحط ألحق على حدا تاني وهو يا حرام ما خصو
هني الزعماء عم يستغلو الناس والناس يا حرام ما ألن خصه بي شي
الطفل يلي بيفكر بطريقه بريئه ما فيكن تغشوه
إذا قلت لابنك ما تدخن والسيجاره ما بتترك تمك …كيف بدك ياه يصدقك ؟
والسياسيين يلي عم ينفخو مذهبيه وطائفيه وخبريات ماريكا القديمه للناس
انو ألحق عليهن أو على يلي بيصدقهن ؟
بدكن تاخدو الجواب الصحيح ؟ سألوا ولادكن قبل ما يصير عمرن ١٣ .
جربو تلحقو حالكن قبل ما ولادكن يديرو ضهرن للارزه ويصيرو كبار ويتركو لبنان
Post it on your Facebook account or mail it to your friends..
Tags: ارشيف الموقع, مجتمع // Add Comment »
Discussion Area - Leave a Comment