هلق وهيدا الشي ألو حسناتو وسيئاتو متل أي شي تاني بالحياة واليوم أغلب الأحداث والمراهقين عندن جهاز كمبيوتر وانترنت واليوم حبيت أحكي عن شي صار بين بنتين من لبنان بيعرفو بعضن وبيحكو سوى عالام أس أن يومياً وهني بيروحو عا ذات المدرسه وهالبنتين اسمهن ساره ومارلين وعمرهن سبع سنين . مره أتفقو انو يحكو مع بعضن بعد المدرسه عالكمبيوتر الساعة اربعه بعد الضهر .بس ساره ما قدرت تحكي مع مارلين وما إنشغل بال مارلين لانو هيدي مش أول مره ساره بتوعدها انو تحكي معها وما بتقدر   بس زعلت وتاني مره بس شافتها بالمدرسه قالتلها أنا نطرتك كتير مبارح يا ساره ليش ما كنتي أون لاين ؟ قلت ساره نيلك انتي يا مارلين لانك وحيده .. أنا واخواتي بالبيت منضل خناقه كرمال الكمبيوتر و قبل ما يجي دوري بتطلع روحي … يا ريتني متلك وحيده عند أهلي كان الكمبيوتر صار لالي لوحدي . مارلين يلي كانت زعلانه من ساره تطلعت فيها لساره وقالتلها …انتي يلي نيالك يا ساره عندك تلات أخوه عندك خيين وأخت ..يعني عندك حدا تقوليلو يا خي أو يا أختي ..بتعرفي يا ساره وقت يلي سألني بيي شو بدك يا مارلين بعيدك هديه ؟ بتعرفي شو قلتلو ؟ بدي خي أو أخت ..قالي يا مارلين يا بابا إذا صار عندك أخوه بيصيرو يشاركوكي بكل شي وما رح فيي جبلك كل هلاشيأ الغاليه الك لوحدك ويمكن ما تقدري تفوتي على أحسن جامعه بس تكبري .. أنا يا بابا بدي أعطيكي أفضل مستوى معيشي بالحياة … قلتلو لبيي … يا بابا أنا كتير بقدر يلي عم تحاول تعملو بس أفضل مستوى معيشي يا بيي هوي انو يكون عندي أخوه وما في مصاري ولا علم ولا جامعات ولا شي بيقدر يعوض علي هالحرمان من انو يكون عندي أخوه …أنت قلتلي با بيي انو المشكله مش جسديه ..يعني فيك أنت والماما تجيبو ولاد بعد .. أنت قلتلي انو السبب هوي لانك بدك تعطيني الأفضل وتحط كل جهدك علي أنا لوحدي ..مظبوط يا بيي انو أنا عمري سبع سنين بس ومظبوط أنك أنت بتعرف أكتر مني بكتير بس بليز سمعني شو بدي قلك … بدي قلك أني فخوره كتير فيك يا بيي وبيلي عملتو بحياتك وبنجاحك وأنا كتير فخوره أني كون بنتك …بس يا بيي أنت عندك أخوه وما كنت وحيد بلا أخوه متلي وأنت قلتلي انو جدو ما كان كتير معو مصاري وانو انتو كنتو مبسوطين بحياتكن… وأنا  بعتبرك يا بيي أغنى انسان بالدني كلها بعطفك وبحنانك وبإحساسك وبثقافتك وبمحبتك لعيلتك ولكل الناس .. أنا بعرف انو بدك يني صير من أفضل الناس ويصير عندي مستقبل منيح … بس يا بيي بترجاك تسمعني وتعرف انو أفضل مستقبل بتعطيني ياه هوي خي أو أخت أقدر قلو خيي وقت ما كون مبسوطه واقدر قلو آخ وقت ما بكون موجوعة .. وقت أنت والماما بتروحو وبتتركوني ..مين رح يحضني وعا كتف مين بدي أبكي ؟ وقت يلي خلصت مارلين كلامها كانت ساره غارقه بالبكي وغمرو بعضن ساره ومارلين وقالت ساره لمارلين .. كيف بدي أشكرك يا مارلين لانك فتحتي عيوني على أحلى هديه الله اعطاني ياها اخواتي .. قالتلها مارلين لساره بتعرفي يا ساره شو قال البابا بعد يلي قلتلو ياه ؟ غمرني وقللي يا بنتي انتي لو طلبتي مني المستحيل كنت رح أعملو وتأكدي انو رح عمل جهدي حتى حققلك أمنيتك  انو يصير عندك أخوه وقلتلو لبيي انو الكمبيوتر والفيسبوك منن اخوتي واغلب يلي موجودين

على الصفحه عندي ما بيعرفوني مين أنا وكيف بحس وقت يلي بكون زعلانه ووقت يلي بكون فرحانه اخواتي هني رح يصيروا حياتي . مين فينا يلي بيقدر يتصور حياتو من دون أخواتو ؟أنا ما بقدر أتصور كيف ممكن يكون للحياة معنى من دون اخواتي . فرحوا معي مع فرح مارلين باخوتها الموعودي فيهن وفرحو بأخوتكن هلق وما تخلو شي تاني يبعدكن عنن .

وبآخر سطر بقول لكل الأهل يلي قادرين يفرحو قلوب ولدهن متل ما فرحت مارلين .. ما تنطرو وما تعتلو هم كتير .. حلوي العيله تكون كبيري والفرح بيصير أكبر .