Posted on July 3rd, 2009 by Alain Safa
Lebjournal.com
ألان صفا
بلشت اوعى عالدني حواليي وبلشت ميز بين الألوان
بلشت أعرف شو هوي الفرح وشو هوي الحزن
بلشت حس بالوفره وبلشت حس بالشح
العالم حواليي كان زغير
كان متل دكان عندو كم غرض بس منو سوبر ماركت
لمن بلشت أعرف هودي كلن بلشت أعرف مميزاتي يلي الله عطاني ياهن
حسيت حالي أغنى انسان بالدني وقت ما بلشت استعمل مخيلتي يلي هي من أعظم العطايا يلي الله عطاني ياها
كنت بس اكبس كبسة زر عامخيلتي وكانت تاخدني عا كواكب تانيه هونيك كانو الناس يحلمو متلي وكانو يفهمو علي
كان في مرايات كثيره وين ما رحت كان في مرايه وكل مره تطلعت بالمرايه شفت عالم جديد وتعلمت أشياء جديده وأفق أعلى ومجالات أوسع يمكن هيدا يلي خلاني صير مبدع بتزيين الشعر ؟
وكل مره كنت أرجع من حلمي للواقع كنت خبر اصحابي شو صار معي وبأيه مدينه كنت وكم طياره نزلو وطلعو وأنه كنت بباريس قبل الضهر ومرقت بطريقي عا روما وهلق أنا هون
كانو رفقاتي يطلعو فيي ويقولو أنت ملك التفنيص بلا منازع
اصلاً هني ما كان عندن كبسة الزر يلي كان عندي ياها ،كانو بلا مخيله وكنت أشفق عليهن
مهما كان الواقع رمادي ومضجر وصعب ومهما كانت التحديات كبيره ما في نهار نسيت اكبس عالزر حتى أقدر عبي خزان الحيويه ولحتى ما خلي الصعوبات تتغلب علي
بالمدرسه يلي تعلمت فيها كانو يعلمونا الأحرف الأبجديه بس بمدرسة الحياة تعلمت اكتب أحرف ما بتنكتب بحبر أحرف من لغه عالميه بيعرفوها الغني والفقير المتعلم والجاهل والملحد والمتدين
هيدي اللغه اسمها الأنسانيه
هي لغة العيون يلي ما بتكذب
وهيدا يلي دايماً بيخليني حب ويكون عندي شغف وولع أكبر بالانسان ككائن بيوزع السعاده للاخرين
كائن خلق على صورة الله من الجمال والحسن والحكمه والعدل من دون أي تفرقه بين دين أو عرق أو لون أو خلفيه
كلنا موجودين بطريق اسمو التفتيش عن معنى الحياة وبطريقنا كتار منا بيفتكرو انو المال يمكن بيجلب السعاده
وكتار كمان بيفتكرو انو السلطه بتعطيهن الأمان والسيطره على وضعن
بس شفت انو لا المال ولا السلطه قدرت تعطي السعاده والأمان للبشر بالرغم انو مش غلط يكون الأنسان طموح ويشتغل حتى يحقق مستقبل جيد انما يلي بيخليني كون على حذر من طريق الشهره هي بأنها لم تجلب بنهاية المطاف ألسعاده لاصحابها انما بالعكس تماماً
حب الأنسانيه وحب العطاء توأمان
لانه يلي بيحب خيو الأنسان بيعطيه من دون مقابل
ونتيجة العطاء هوي الفرح
والفرح أو السعاده هي العمله الصعبه يلي الكل راكضين حتى يوصلولها
الحلم الواعي منو حلم بتفيق منو وبتقول يا الله يا ريتني ما وعيت
الحلم الواعي هو الحلم المستمر يومياً وقت ما بتعرف كيف تشتغل وتجهد منشان مستقبلك وكمان وقت ما بتتمتع بالحياة وبتشوف الأحتمالات وما بتركز على المعوقات
وقت ما بتلتقي بشخص جديد أو بصديق قديم ركز على الأيجابيات وفكر كيف فيك توصلو السعاده لهيدا الشخص فكر أنه هيدا اللقاء هوي لقاء مميز
جرب تعطي الأفضل حتى تلقائياً تأخذ الأفضل
جرب كل ما تلتقي بأنسان أنك تزيد على يومه لمسة حنان وفرح وأمل وسعاده
بتذكر اللوح الأسود بالمدرسه ؟
لو فيك تعمل لوح للتذكير وتحطو بالكوريدور حد الباب منشان تقرا شو مكتوب عليه قبل ما تضهر من البيت كل يوم
كتوب عاللوح : الرحله بعدها بأولها .ما تاخذ معك عالرحله أشياء مش عايزها .
ما تاخد معك وجه عبوس ولا تاخذ معك قلب كئيب وما تاخذ معك أحكام مسبقه عن الآخرين
خود معك بهالرحله البسمه عا شفافك وأفكار ايجابيه بتوصلك للمحطه الاخيره ويلي هيي معنى الحياة
وما تنسى تكبس الزر
Post it on your Facebook account or mail it to your friends..
Tags: مجتمع // 2 Comments »
wowowowwwwwwwwwwwwwwwwwwwwwwwwwwwwwwwwwwwwwwwww perfectttttttttttttttttttttttttt
الأنسان من دون مخيلة هو انسان فقير وهالمخيلة اذا انوجدت لازم تكون ايجابية بمعنى انها تساعد الانسان يطلع من همومه أو احزانه أو من مشاكله. لكن أوقات كتيرة وعند ناس كتار بتكون الهموم و المشاكل مزمنة ومتراكمة ومستمرة ومتنوعة وصعبة بشكل أنو ما ممكن هالانسان يتناساها أو يتجاهلها أو يمر بجانبها وكأنها غير موجودة وحتى لو كبس مية زر الوضع ما رح يتغير فيه شي
ما بعرف بهيك وضع أداي الواحد بيقدر يكون ايجابي ( ويمكن ما يكون سلبي) الايجابية بتكون صعبة وحتى لو انوجدت رح ترجع تنصدم بواقع مرير
حلو الانسان يكون ايجابي وحلو انو نحكي بالمثاليات بس لمن الانسان يكون مهموم كتير ما بينفعوا هالحكيات وبيحس حالو بوادي واللي عم يحكي بوادي تاني