عجبني جمالها وعلبني بياض بشرتا يا دلالها، عيونها بلون الخيار وشعرها بياخدك عالمطار لونو دبس عطحينة، دخيلكن انا عالحلو ما فيني تسلملي فتحة تمها، شوفوا لما بتضحك ويبين سنها . خدودا معجنات بينحط عليهن زعتر وزيت . راسها مدور مش متل السطيلة ، وطلتها ستايليش مش متل الكيلة هيدي فراند عندي جديدة… عالفايسبوك واسمها فريدة رغبت اتعرف عليها، وتصير تكتبلي بصابيع ايديها كتبتلها عالوول بالفرنسي لما قررت واجتني الفقسة

 

اي لا تندهي ما في حدا، ولا يهمك غاس خليك عالهدى . نطرلك كم يوم بركي عليك بتحن وكلامك بقلبا بيعود يرن . بس ما الهيئة في احساس، أو يمكن مستحية، مش بالسهل بتنباس . رجعت كتبتلا عالوول بركي ضغطا بيقشط، والحيا عندها بيفرط

نطرت من الخميس للخميس ،والحال من بعضو لا حس ولا حسيس . يبعتلا شو متقلي حالها………اي ومغيص. قلت طول بالك يا أبو الغيس الا ما تلين وتحسك مهضوم وأنيس . هالمرة تقل العيار… الا ما تنقش ومن عندا توصلك الاخبار . رجعت عالوول كتبتلها، وقلت اذا ما ردت هالمرة، يا دلها

 

اي لو دجاجة كانت باضت من حلاوة الحديس .لو بنت وتقدمت تا اخطبها كان طار عقلها بهيك عريس شو سمتلي بدني .انا عمرو دولابي ما بنشر ليش هيك حظي مشحر وهلق الوقت صار مأخر وما قادر نام وانا موتر راح اكتبلا بالمشبرحي ..انتو شو كنتو بتعملو مطرحي؟ هاي آخر خرطوشة وتصطفل ….اكتر من هيك ما رح انهبل

كتبتيلها عالوول تبعا ……….اي ليكي فريدة

ما تقولي خبصتها بالأخير ….. لاني نعست وبدي نام تا فيق تماني بالكتير ….. تا اوصل عا شغلي بكرا مع ساعة تأخير….. وبالفرنسي ما بقا رح اكتبلك صار وقتي قصير….. ياي.. بلاكي الفايسبوك شي كتير تعتير …. بس تكوني اوفلاين بغص عالأخير…. وبس تكوني اونلاين، بقليك سون مونتير…..قلبي بيفرح وشفافي بترسم  ان سورير….ان كان بدك بلاقيكي عالبربير….في هونيكي واحد تبع عصير….علي يمين بياع الفلافل وعا شمال بياع اللعب والطراطير ….وبدك بشي محل تاني، كماب بيصير

 ما في دقيقة الا وضوا الأحمر . يا ترى شو اللي تغير…في نوتيفيكايشن جديدة وعلى وولي كتبت فريدة

ولك كنت كتوب من الأول، بالعربي المبسط المسهل. انا كنت عايشة بانكلترا وفرنسي ما بعرف بالفطرة . انا فرنساوي لا بقرا ولا بفهم …ولا يهمك ماي فراند، بكرا منك بتعلم …..ولما اجا تانيي يوم… لأ خلص. رح اوقف لحد هون … يللا بيكفي قر ، الباقي بيبقى بيني وبين فريدة سر… بس للمزبوط كان اسمها فيفي بس بيدلعوها فريدة ،هيك هي قالتلي، صدقتها انا ما كان بايدي

           انتهى

ان هذه القصة محض خيال ولا تمت بصلة لا لغاس ولا لفريدة او ليال. وما حدا ياخد عني فكرة سيئة ،ما هيك بفكر ولا هيك بثرثر . ببقى غاس آدمي عالأخير….. وعالفايسبوك فايسي واحد… مش دوبل فاس، فاس طيب وفاس شرير

Tags: ثقافة وادب وناس // 4 Comments »